Ciidamo ka tirsan kuwa ammaanka ee magaalada Muqdisho ayaa saddex habeen ka hor guryahooda kala baxay mas’uuliyiin ka tirsan maamulka degmada Kaxda ee gobalka Banaadir, sida ay ogaatay Warkii.com.

Sida ay ilo-wareedyo lagu kalsoon yahay u sheegeen Warkii.com, mas’uuliyiinta la xiray, ayaa kala ah:-

1 – Cabdullaahi Cabdiraxmaan Abiikar “Caano geel” oo ah guddoomiyaha dhallinyarada ee degmada Kaxda.
2 – Zakariye Cabdullaahi Cilmi, guddoomiyaha Waaxda 3-aad ee Cumar Fiyaasko.
3 – Faaarx Qooreey, guddoomiye ku-xigeenka Waaxda 1-aad ee Jeneral Liiq-Liiqato.

Illaa iyo hadda ma cadda, sababta loo xiray dadkan, mana jirto wax faah-faahin ah oo ay arrintaan ka bixiyeen mas’uuliyiinta amaanka iyo maamulka gobalka Banaadir iyo kan degmada Kaxda.

Warar ay heshay Warkii.com ayaa sheegaya in mid kamid ah xubnaha la xiray uu markiisii hore ka tirsanaan jiray Al-Shabaab balse uu ka soo baxay sanado ka hor.

27-kii October, degmada Kaxda ayaa waxaa ka dhacay toogasho lagu dilay guddoomiye waaxeed iyo qof la socda, kuwaasi oo xilligaas olole tallaal ka waden degaanka markii la toogtay.

Dilkaasi kadib ayaa la sheegay inuu isla goobta ka dhacay qarax baabuur kaasi oo ay afar qof ay ku dhinteen kuwo kalena ku dhaawacmeen.

LEAVE A REPLY

Please enter your comment!
Please enter your name here