Wararkii ugu dambeeyey Dabkii caawa ka kacay meelo ka mid ah Suuqa Bakaaraha

Dab goor dhow oo caawa ah qabsaday qeybo ka mid ah suuqa Bakaaraha ee magaalada Muqdisho ayaa la soo sheegayaa in lagu guuleystay haatan in la demiyo.

Dabka ayaa qabsaday meelo ka mid ah qeybaha lagu iibiyo Maacuunta, cilaanka iyo nawaaxiga Suuqii Khaliifa ee ku gubtay dabkii todobaadyo ka hor ka kacay isla Suuqa Bakaaraha.

Gaadiidka dab demiska oo goobta gaaray ayaa wax yar ka hor ku guuleystay iney ka hortagaan dabkaas oo ku sii faafi rabay qeybaha kale suuqa, lamana oga illa hadda sababta kicisay dabkan iyo khasaaraha ka dhashay inkastoo wararku sheegayaan in hantida gubatay aysan aad u badneyn.

Todobaadyo ka hor ayey aheyd markii dab socday saacado badan uu baabi’iyey Suuqa Bakaaraha gaar ahaan qeybtii Maacuunta, Suuqa loo yaqaano khaliifa oo ka koobnaa dukaamo iyo carwooyin ku dhow kontomeeyo iyo qeybo muhiim ah oo Suuqa ka tirsanaa.

Dabkaas oo kacay xili maalin ah ayaa waxaa ku naf waayey hal qof, qaar kalena wey ku dhaawacmeen dhowr kale, khasaare hantiyeed oo malaayiin dollar lagu qiyaasay ayuuna geystay dabkaas.

Leave a Reply

Your email address will not be published. Required fields are marked *

*

error: Content is protected !!